Van 16 tot 19 Februarie 2017 word die 37ste VKB BIELIEMIELIEFEES in Reitz aangebied en dit gaan verseker een vir die boeke wees, met hope veranderinge en nuwe aktiwiteite vir oud en jonk om te geniet.

’n Nuwe kuier-area reg voor die verhoog waar jy lekker kan sit, ontspan en kuier is een van die nuwe veranderings waarna jy kan uitsien. Daar kan feesgangers ’n propvol verhoogprogram geniet met groot name in die musiekbedryf, soos Francois van Coke, Refentse, Steve Hofmeyr, Leah, Snotkop en Anton Botha.

Die fees maak ook plek vir ’n aantal opkomende sangers om hul talent te kom tentoonstel en ons te kom vermaak. Kyk uit vir Duani Kotze, Zurilda, ShoNeil, James & André, Hailey Clark, Linda Kilian, Keagan Rossouw, Skarlaken en Witkasteel, wat almal op die verhoog te sien sal wees.

Schalk Bezuidenhout, die skreeusnaakse komediant wat deesdae op die gewilde kykNET-program Hotel te sien is, kom kuier ook by die fees as ons programleier en seremoniemeester. Maak julle dus gereed om lekker te lag.

Daar is ook hope nuwe vermaak soos Wian van der Berg, ’n briljante kulkunstenaar wat ’n finalis op die TV-program SA’s got talent was en al in plekke soos Las Vegas, Dubai, Londen en Los Angeles opgetree het.
Die jongspan sal ook nie verveeld raak nie, want die gewilde Tjiff en Tjaff kom vir hulle kuier! Aktiwiteite soos skopfietsies, sagte speelgoed, gesigverf, inkleur en kleispeel word in die “Kiddies Den” aangebied met ’n avontuurland, spring- en speelkasteel wat hulle die ganse dag sal besig hou.

Vir die sport- en avontuurgeesdriftiges word daar ook weer ’n bergfiets-, ’n vierwielmotorfiets-wedren, marathon, bulletjierugby en mini-netbal aangebied. Nuut op die program is die Inflatable Warrior Race – ’n resies wat herinner aan die destydse Gladiators op TV maar gemeng met ’n springkasteel! Kom wys gerus jou slag teen hierdie opblaas-hindernisse!

Feesgangers moet ook nie vergeet om in te skryf vir die vele kompetisies nie. Kinderkuns, fotografie, stronkbraai, en Mnr. en Mej. VKB is maar net ’n paar van die items waar jy lekker groot pryse kan wen.

Uiteenlopende uitstallings op ’n propvol feesterrein soos veestalle, implemente, motors, juwele, speelgoed, klere en nog vele meer wag op die feesgangers. Kosstalletjies en lekkernye vir elke smaak kan geniet word terwyl ’n biertuin vir die dorstiges sal sorg. Daar sal die welbekende Anton Botha besoekers deurentyd vermaak.

Die 2017 VKB BIELIEMIELIEFEES beloof om een van die lekkerste feeste te wees wat jy kan bywoon. Besoek ons web- of Facebook-blad vir die jongste inligting, program, inksrywingsvorms, foto’s en meer.

Die fees spog ook met ’n toep (app) wat jy binnekort op jou slimfoon of tablet kan aflaai waar jy die program en alle ander inligting oor die fees kan kry. Jy sal ook in kennis gestel word van wat gebeur waar gedurende die fees indien jy die toep op jou foon het.

Teken sommer nou al die datum in jou dagboek aan en hou dit oop vir die fees met gees. Sien jou daar!

 

 

 

 

 

 

 

 
 

 

Vinaora Nivo Slider 3.xVinaora Nivo Slider 3.xVinaora Nivo Slider 3.xVinaora Nivo Slider 3.xVinaora Nivo Slider 3.xVinaora Nivo Slider 3.xVinaora Nivo Slider 3.xVinaora Nivo Slider 3.xVinaora Nivo Slider 3.xVinaora Nivo Slider 3.x
Vinaora Nivo Slider 3.xVinaora Nivo Slider 3.x